భారతీయ విజ్ఞానం అంతా ప్రకృతి ధర్మంతో ముడిపడి ఉంటుంది. ప్రకృతి యొక్క మార్పులకు అనుగుణంగా మన శరీర మానసిక వ్యవహారాలను మార్చుకుంటూ ఉండాలి. వానికి సరియైన విధి విధానాలను మన సంస్కృతి సంప్రదాయాలు సూచిస్తుంటాయి. వానిలో భాగమైనవే మనం నిర్వహించే అనేక వ్రతాలు, దీక్షలు, పండుగలు.
దీపావళి’ అంటే దీపాల వరుస. ప్రతి యేడాదీ అశ్వీయుజ బహుళ చతుర్దశినాడు జరిగే దీపాల పండుగకే దీపావళి అని పేరు. ఈ పండుగ లోకమంతా జరుపుకోవడానికి మూడు చారిత్రకాంశాలున్నాయి.
తెలంగాణ జనపదాలలో ‘దివిలె’ పండుగగా ప్రసిద్ధిగాంచిన దివ్వెల పండుగ దీపావళి. ఈ పండుగ వెలుగులకు నిధానం. జనుల జీవితాలలో నిరంతరం వెలుగులు కురవాలని ఆశించి జరుపుకునే ఈ పండుగకు ఎంతో చారిత్రక ప్రాధాన్యత ఉంది.